ꀱꀁꇬꈎꏅꁦꀋꄐꀐ

ꁱ：ꏾꐚꈬꁈ

ꀘ：ꇍꇖꀉꇤ

ꁧꇁꇉꎔꆀꃅꋼꒌꄀ

ꃅꃴꏷꋦꆀꌺꉂꅇꄜ

ꆀꌺꉂꃆꆈꒉꅼꇻꀕ

ꋦꁍꀉꆹꀋꉂꄮꀋꐥ

ꈨꑭꇂꃴꃢꎔꌄꆣꀕ

ꇤꈏꏢꁮꉌꃀꊷꆣꀕ

ꁍꁈꌧꇐꊂꋊꉌꃀꑌ

ꀘꂾꀗꃚꃄꇖꈬꁕꉼ

ꌺꇖꋬꂻ꒔ꉻꎔꒌꆚ

ꃅꈎꃅꆪꏮꀱꏮꇉꈫ

ꉂꏣꉂꑟꑵꉙꇶꍠꀕ

ꈎꏅꂒꉻꋧꃅꆻꄧꈨ

ꃭꇁꈚꄉꆀꃅꈎꏅꇁ

ꆀꌺꆀꅪꉪꇐꏟꈯꀕ

ꁍꇁꀿꒌꌺꇖꀑꇬꄏ

ꐥꌒꄻꌒꉪꐨꇇꇐꐊ

—— ꈎꏅꌒꅇ

ꃅꈎꃅꆪ

ꃅꑍꃅꉖ

ꋍꈓꇈꋍꈓ

ꋍꑍꇈꋍꑍ

ꈎꀱꆪꊂ

ꑍꀱꉖꊂ

ꀋꋓꀋꉪꄷꋍꈓꈢꋒꁧꂯꄉ！

ꆿꆪꏭꁧꏂ

ꃅꋅꄚꄉꃹ

ꁧꀐꁧꄩꌩꏾꇓꏾꊰꁦꌐ

ꃅꌗꄚꄉꈺꄂꀕ

ꆀꃅꆈꌠꈎꏅꂷꑌꄚꑟꇁ

ꆈꌠꌺꇖꋋꁯꆹꈎꏅꄔꊒꀨꇬꄉ

ꈎꏅꄭꇬ ꀿꉂꃀꉂ

ꏣꉂꑟꉂ ꋊꉂꃤꉂ

ꌺꉂꇖꉂ ꅪꉂꌱꉂ

ꈎꏅꇁꄮꇬ

ꀿꀋꁨꌠꑌꀿꉂ

ꃀꀋꁨꌠꃀꉂꇁ

ꀎꋏꀿꃀꀱꇁꌺꇖꇁꉚꈎꏅ

ꌺꉂꀿꅇꄜ

ꅪꉂꃀꅇꄜ

ꈢꈐꈢꉇꉷꃅꇓꈓꇿꐥꄿꂾ

ꀱꇁꆺꑳꏂꃴꏮꈎꏅꌒꅇꄜ

ꉡꆹꎼꈎꆏꀱꈎꏅꁧꀋꄏꀐ

ꇭꀧꀉꄂꏭꃰꏿꏭꐛ

ꉌꃀꆹꈍꄮꇯꆐꀉꄉꐊꈎꏅꌩꏓꐹ

ꀉꂿꐊꈎꏅꐂꇓꃴꆍꐹ

ꀂꑲꅫꃀꈨꌠꄷꉻꏢꁮꑌꄉꈎꏅꃅꑍꌗ

ꋋꑌꆀꃅꆈꌠꊿꇬꋬꂻꏅꌠꉬ

ꏣꃀꏣꑟꈎꏅꃮꎸꀵꇁꌒꃅꌒꅇꄜ

ꃮꏾꃮꇇꆎꀵꉠꅍ ꉢꀵꅽꅍꉌꃀꒊꌋꀕ

ꈎꏅꀊꁌꄚꄉꑊꑍꒊꆲꀕ

ꀉꄉꎸꐡꎸꄀꑱꄧꁯꆴꃯ

ꀉꂿꃮꃶꋋꋴꇤꄩꄃꆹꀕ

ꀎꋏꀿꃀꈎꏅꀊꉱꋍꊱꇈꋍꊱ

ꈎꏅꑘꀕꄚꄉꇖꈭꀕ

ꆈꌠꈎꏅꋍꈓꋍꃅꄚꄉꏅꅉꌒꅉꑟꅊꇈ。